ಪಿ.ಇ.ಎಸ್ ವಿಶ್ವವಿದ್ಯಾಲಯದ ಕನ್ನಡ ಕೂಟಕ್ಕೆ ಸುಸ್ವಾಗತ

ಮನಸ್ಸುಗಳ ನಡುವೆ ಭಾವಪರಾಗವನ್ನು ರವಾನಿಸುವ ದುಂಬಿ ಭಾಷೆ. ದುಂಬಿ ಸಂಪಾದಿಸಿಹ ಜೇನು ಕನ್ನಡ! ಆ ಜೇನ ಹೀರುವ ರಸಿಕರು ನಾವುಗಳು!

ಕನ್ನಡದ ಪರವಾಗಬೇಕು, ಕನ್ನಡದ ಕಾಯಕಕ್ಕೆ ಕೈ ಜೋಡಿಸುವ ಕರವಾಗಬೇಕು, ಮಾತೆಯ ಕೊರಳಲ್ಲಿನ ಸರವಾಗಬೇಕು, ಕನ್ನಡದ ಉದ್ಯಾನದಲ್ಲೊಂದು ಮರವಾಗಬೇಕು ಎಂಬುದೇ ನಮ್ಮ ಆಶಯ!

ಕರ್ನಾಟಕದ ಹಾಡು-ಕುಣಿತ, ಭವ್ಯತೆ-ನವ್ಯತೆ, ಪ್ರಕೃತಿ-ಸಂಸ್ಕೃತಿ, ಸಂಪದ-ಜಾನಪದ, ಉಡುಗೆ-ತೊಡುಗೆ, ಊಟ-ಉಪಚಾರ, ಹಬ್ಬ-ಹರಿದಿನ, ವ್ಯವಹಾರ-ಆಚರಣೆ, ರೀತಿ-ನೀತಿ‌-ಪ್ರೀತಿ ಹೀಗೆ ಹತ್ತು ಹಲವಾರು ಧಾತುಗಳ ನಡುವಿನ ಸೇತುವಾಗಿ ನಿಲ್ಲುವುದೇ ನಮ್ಮ ನಿಲುವು. ಇವೆಲ್ಲವನ್ನು ಸ್ವಾಗತಿಸುವ ಮತ್ತು ಸಂಭ್ರಮಿಸುವ ಸಾಂಸ್ಕೃತಿಕ ಹಾಗೂ ತಾಂತ್ರಿಕ ಕಾರ್ಯಕ್ರಮಗಳ ಮುಖಾಂತರ ನಮ್ಮತನದ ಭಾವನೆಯನ್ನು ಉದ್ದೀಪಿಸುವ ಕೆಲಸ ನಮ್ಮದು

ಭಾಷೆ ಎಂಬುದು ಪೆಟ್ಟಿಗೆಯಲ್ಲಿ ಗಾಜಿನ ಹಿಂದಿಟ್ಟು ಸಂರಕ್ಷಿಸುವ ಗ್ರಂಥ ಎನ್ನುವುದಕ್ಕಿಂತ ಅದರ ಪ್ರತಿ ಶಬ್ದವೂ ನಮ್ಮ ಸ್ವಂತ ಎನ್ನುವುದು ನಮ್ಮ ನಂಬಿಕೆ.

ನಮ್ಮ ಪಾಲಿಗೆ ಇದು ಬರೀ ಭಾಷೆಯಲ್ಲ, ನಮ್ಮ ನಾಲಿಗೆಯ ತುಡಿತ, ಎದೆಯ ಬಡಿತ, ಮನಸ್ಸಿನ ಮಿಡಿತ!